ಹತ್ತರ ಸೊಗಸು

ಕೆನ್ನೆಗಿತ್ತಾಗ

ಗಲ್ಲದಲ್ಲಿ ಗುಳಿ

ತುಟಿಗಳಿಗೂ ಸಹ

ತಹತಹ

ಅಂಗಾಲಿಗಿಟ್ಟರೆ

ತಪ್ಪೇನು


ಒಪ್ಪಿ ನಡೆದ ಹೆಜ್ಜೆ

ಗುರುತಿಗೆ ವರುಷ ಹತ್ತು

ಒತ್ತೊತ್ತಾದ ಕೂದಲೀಗ

ಸ್ವಲ್ಪ ವಿರಳ

ಹಾಗೆಂದು

ಮಲ್ಲಿಗೆ

ಮುಡಿಯ ಬಾರದೇನು?


ಕಳಿತದ್ದು ಮಾವು,

ಜೊತೆಗೆ ಬೇವೂ

ಬಣ್ಣದ ಸೌತೆಗೆ ಕೆನ್ನೆಯಲಿ ಸುಕ್ಕು

ನಾಳೆ ಅದ ಬಳಸಿಬಿಡಬೇಕು

ಬೋಗುಣಿಯಲಿ ಹೊಂಬಣ್ಣದ ಅಚ್ಚು

ಹಳೆಅಕ್ಕಿ ಒದಗುವುದು ಹೆಚ್ಚು



ರಸ್ತೆ ತಿರುವಲ್ಲಿ ಬೆಣ್ಣೆಪಾದ,ಶ್ರೀಪಾದ

ಮನದಲ್ಲಿ ಹತ್ತರ ಸೊಗಸು

ಇಪ್ಪತ್ತು ಬೆರಳುಗಳಿಗೇಕೋ

ಈಗೀಗ ಸ್ವಲ್ಪ ಮುನಿಸು

ನಾಲ್ಕು ಕಣ್ಣಲ್ಲಿ

ನೂರು ವರುಷದ ಕನಸು